منة

منة يا حتة سكرة
يا وردة بيضا معطرة
دا كل الناس حبوكى
ياقمرة جميلة منورة
اه يا طعمة يا حلوة يا منوسة
وكبرتى وبقيتى عروسة
ارقيكى وم العين محروسة
واضمك واديلك بوسة
وعريسك بيكى فرحان
هتعيشوا ايام ف حنان
ونوصى عليكوا الجيران
وابوكى تايه حيران
انتى عنده جوهرة
بيحبك ويموت فيكى
وامك بتسمى عليكى
واخواتك يرقصوا حواليكى
دى الفرحة جميلة مزهرة
اه يا منه يا حتة سكرة

حزن مصر

على حزنك ماتت العصافير
جتت بتترمى وعيال بتطير
وهمك حدوتة مصرية
هتتحكى مع الاساطير
على فين يا بهية
وخداكى الدنيا
على حرقة قلب أم شهيد
ولا حرق كنيسة يوم العيد
على حرق اب مسافر لابنه
جوا قطر سكة حديد
على حرق جامع يوم جمعة
مبنى قصادى ولسة جديد
على فين يا بهية
لسة شوية
ياما هتشوفى كمان وكمان
علشان الدم بقا مية
والضمير بقا ف التوهان
علشان مبقاش جوانا انسان
علشان ... علشان ... علشان
بقيتى شايلة الهم اكوام
والاحزان تضرب تمام
بقينا عايشين ف جهنم
والماضى دا كان أحلام
لا هيرجع يوم ولا يسلم
وبقينا يادوب نتندم
وخرسنا خايفين نتكلم
هنصدق مين والا مين
بقينا جوانا تايهين
لا متنا ولاعايشين
وسؤال واحد هنقوله
هو احنا نبقى مين؟